غزہ میں طوفانی بارش نے بے گھر فلسطینیوں کی مشکلات مزید اضافہ کردیا
غزہ میں طوفانی بارش کے بعد لاکھوں افراد آسمان تلے زندگی گزارنے پر مجبور ہوگئے ہیں۔
غیر ملکی خبر رساں ادارے کی رپورٹ کے مطابق غزہ میں طوفانی بارش نے بے گھر فلسطینیوں کی مشکلات مزید اضافہ کردیا ہے۔
جنوبی غزہ میں بے گھر افراد کے خیموں میں بارش کا پانی داخل ہوگیا جس کے باعث ان کو شدید پریشانی کا سامنا کرنا پڑ رہا ہے۔
عارضی کیمپوں میں پہلے ہی گنجائش سے زیادہ افراد موجود ہیں جب کہ سیوریج کا نظام نہ ہونے کے باعث صورت حال مزید خراب ہورہی ہے۔
وزارت صحت کے مطابق بارش کے باعث متعدد بیماریاں پھیل رہی ہیں جب کہ اسرائیلی حملوں کے بعد 19 لاکھ بے گھر افراد میں سے 3 لاکھ 60 ہزار سے زائد افراد میں انفیکشن کے کیسز رپورٹ ہوئے ہیں۔
اقوام متحدہ کے دفتر برائے رابطہ برائے انسانی امور نے غزہ کی تازہ ترین صورت حال پر رپورٹ جاری کرتے ہوئے بتایا کہ گردن توڑ بخار، چکن پاکس، یرقان اور اوپری سانس کی نالی میں انفیکشن کے کیسز رپورٹ ہوئے ہیں۔
انہوں نے بتایا کہ علاقے میں 36 میں سے صرف 11 اسپتال کام کررہے ہیں جب کہ نئے مریضوں کے داخلے کے حوالے سے گنجائش میں کمی کا سامنا ہے۔
وزارت صحت کے مطابق مریضوں کو داخل کرنے کی گنجائش اب 206 فیصد سے بڑھ کر 250 فیصد تک پہنچ گئی ہے۔
یاد رہے کہ اسرائیل نے حماس کے ساتھ ہونے والی جنگ بندی کے خاتمے کے بعد یکم دسمبر سے ایک مرتبہ پھر غزہ کی پٹی میں اپنا فوجی حملہ شروع کردیا ہے۔
اسرائیلی حملوں میں اب تک 18 ہزار سے زائد فلسطینی شہید اور 46 ہزار سے زائد زخمی ہوچکے ہیں۔
