ہم اپنے چہرے پر اکثر ابھرنے والے کیل مہاسوں سے پریشان رہتے ہیں اور ان کے علاج کے لیے مہنگی ترین کریموں اور ادویات کا استعمال کرتے ہیں لیکن ایسا آسان اور سستا نسخہ بھی ہے جو ان سے نجات کیلئے بے حد مفید ہے۔
اے آر وائی نیوز کے پروگرام گڈ مارننگ پاکستان میں شوبز کی معروف اداکارہ حرا سومرو نے کیل مہاسوں کے علاج کیلیے اپنا آزمودہ نسخہ ناظرین کو بتایا۔
انہوں نے بتایا کہ صرف دو چیزوں پودینہ اور دہی سے بنا ہوا پیسٹ کیل مہاسوں سے فوری علاج ممکن ہے، اس کی ترکیب بتاتے ہوئے انہوں نے کہا کہ پودینے کے چند پتے لے کر ہاون دستے میں کوٹ لیں اور اس میں ایک چمچ دہی ملاکر اس کا پیسٹ رات کو سونے سے پہلے دانے پر لگا دیں۔
ان کا کہنا تھا کہ صبح اٹھ کر سادہ پانی سے دھولیں، جن کی جلد آئیلی ہے وہ شہد ڈالیں اور خشک جلد والی خواتین دہی استعمال کریں۔
پودینہ چہرے کے مساموں پر اکھٹا ہوجانے والے تیل کو ہٹانے میں مدد دیتا ہے اور کیل مہاسوں کو بننے ہی نہیں دیتا جبکہ شہد کی جراثیم کش خوبیاں بھی کیل مہاسوں سے نجات میں مددگار ثابت ہوتی ہیں۔
اس کے علاوہ دہی میں پروٹین، کیلشیم، وٹامنز اور پروبائیوٹکس کی مقدار زیادہ ہوتی ہے، دہی ہڈیوں اور دانتوں کو تحفظ فراہم کرنے کے ساتھ ہاضمہ کے مسائل کو روکنے میں بھی مدد دیتا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نوٹ : مندرجہ بالا تحریر معالج کی عمومی رائے پر مبنی ہے، کسی بھی نسخے یا دوا کو ایک مستند معالج کے مشورے کا متبادل نہ سمجھا جائے۔
